INURRI GOSEA

        Leire Bilbao , 2006

Eman dezagun arrastia jausi zaiola sorbaldara

eta oraindik ez dizkiotela egunonak eman,

balkoira hurreratzen dela

eskudelak eusten dion bitartean.

Eman dezagun jendea dagoela behean,

inurri zelai bat, eta berak ere

inurri begiekin begiratzen diela

geldi, hodei beltzak ez bezala.

Eman dezagun ez dela domeka,

ez duela euria ari edo ari duela,

behera begiratzen duela berriz

eskudelari gero eta lotuago.

Eman dezagun hasperen egiten duela

begiak igurtzarazten dizkiola

eguneko lehen asperdurak,

kalean doan inurritzari begira

bat-batean ohartu dela

gose dauzkala sabeleko inurriak.

Eman dezagun gaur ez duela irentsi

bere burua irensteko desioak.

© Leire Bilbao