EGUN BATEZ

        Joan Mari Irigoien , 1975

 

 

              Egun batez,

              ardi bat bezala,

              joera bakar

                    eta

              itsu batean

              bideratu nindutelako,

                          horregatik agian...

 

              Egun batez

              askatasunaren hegalak

              ebaki zizkidatela

              konturatu nintzelako,

                          horregatik agian...

 

              Egun batez

              ostadar batean

              kolore desberdinezko

              zazpi arku

              bereizten

              ikasi nuelako,

                          horregatik agian...,

              jasangaitz eta aspergarri

              egiten zaizkit

              kolore bateko bideak.

 

Hamaika bide hasiak,

        hamaika bider hautsiak,

                  beste

    hamaika

              bide

                      berri

                                hasteko...,

mundua aberri duen

        erromes galdua

                                  iduri.

 

Izan ere,

askatasunaren izenean

ni neu naiz

      neure bizitzaren lemazaina

eta

    muga bakarra jarri diot

                        ene jokabideari:

maitasunaren

      muga gabeko muga...

 

Iluna da bizitza,

        baina

            edozein

                gizon-emakumeren bizitza

                    alferrikakoa ez dela

                          dakidalako...,

aurrera jarraituko dut,

      esperantzaz,

          ene bide gabeko bidean...

 

© Joan Mari Irigoien