NIK EZ DAKIT

        Jose Anjel Irigaray , 1976

Nik ez dakit

zer epeltzen zautan

udazkeneko ilunabar gorritsuetan,

nik ez dakit

zer bustitzen zautan

euri zara-zara ari duenean,

nik ez dakit

zer inarrosten didan

udaberriko neskatila airosak,

nik ez dakit

zer jazartzen zautan

gizaki batek besteari

arnasa estutzen dionean,

nik ez dakit

zer artaldetatik noan iheska

bakardadean galdurik nabilenean,

nik ez dakit

zer den

betikotasunak biharamunik ez izatea,

nik ez dakit

zer den

lurperatuen ezerezaren eza,

nik ez dakit

zer garen, norat goazen

ez eta nondik gatozen,

baina bizitza

goizeko ihintza

bukaerarik gabeko borroka

maite dut eta nahi dut bizi.

© Jose Anjel Irigaray