ADIMENEAN DATZA

        Alex Azkue , 1981

«Adimenean datza,

malko eta nigarren oroigarria,

busti ditu lur, soro eta landak

bere uraren agintez, hodeien

aurka jazarriz».

          I

Herriko enparantzan

lau dira urkatuak

hodei bat, markesa

hilargia eta ezezagun bat.

          II

Ezezagunak aurpegia zurbil,

altzairuzko ezpata eskuan

sabela ireki eta opil bat sokaren hutsunean jarriz

bihotza urkatu du.

          III

Hainbat jenderen nigar eta malkoak

hunkitu du markesa,

begiak hautsi eta jan ditu

jendetza bustiaren aurrean

          IV

Hodeiek nigar egin dute

markesa odoletan ikusirik,

odola eta erreka inprobisatuak nahastean,

amorrainek hilargia jan dute.

          V

Hiletaren ondoren

ugoldeak ebaki ditu tximiniak,

lepoak, ahoak, mintzoak,

ezkilak dilin-dalan zeruari begira.

          VI

Begirada galdu dute

ezkilek zeruan

xinaurriak dira

hondamendiaren izterbegi bakarrak.

          VII

Xinaurriak kantuz

bedatsian egunsentiari

lau gizon urkatuen

maitale bakarrari.

© Alex Azkue