ENDLESS DREAMS

        Patxi Salaberri , 2002

Paradoxak ditu maite gizakiak

eta itzalgaizka dabilen oro du erakargarri.

Urtez urteko zoriontze errituak betetzean,

bere buruaren jabeago agertzen da gizona,

bizi-aldia urte gehiagoz hornitzen uste doakio eta,

iduriz -hala aldarrikatzen baitu berak!-, denbora ere metatzen.

Baina paradoxak maite dituen gizakiak

paradoxak maite ditu, ez etsipen-zama goibel-larriak,

itzalgaizka dabilenaren erakargarritasuna

itzaletik aterarazteko gaitasuna bada ere.

Denbora-errituak betetzen dituenetan,

leihoaz bestaldetik begiratzen dio gizakiak bizitza hastanduari,

gero eta iristearrago baitu

leihakumeak hersteko garaia.

Paradoxak ditu maite gizakiak,

batez ere bere buruari lakatza sartzeko egoki direnak.

© Patxi Salaberri