KEAREN ANATOMIA

        Asier Serrano , 2007

Igande arratsaldekoak ziren gure batzarrak

kantoi anonimoen estolda sekretuak helbide

halakoak baikenituen hitz antzuen orduak

inongo irtenbidera ez zihoazenak

haatik zigarro eternoen keak

mintzo urduriz janzten zituen paretak

suge imajinarioak izpiritua oldartuko bailigun

dantza sentsualaren zentzurik ezean

Hamar bat izan ohi

ginen futbolari muzin egiten genionak

desorduetan hitz zopak eraikiz

iraultzaren hiztegi ofizial laburrari

aurrizkiak erantsiz

testu soziala zen geurea

inori inorena axola ez zitzaiona

Biharamunak lauso asperren eremuetan

belarriek sarrera-irteera dutelako direla bi

eta igandea larunbat bat aurrez badelako dela hits

eta besterik ez zitzaidan argi geratu

mundua konpondu gura genuen astetan

hori eta zure mihiaren mintzo harroa

nire ezpainetan irudika nezakeela

keak sorturiko suge-dantza bailitzan

besterik ez astelehen berrien plazerrerako

© Asier Serrano