KLAUS DETEKTIBEAREN ANOTAZIOAK (HILTZAILEA LORAZAINA DA)

        Jon Gerediaga , 2004

Honezkero tximistek eta eskaleek

harritzen ez duten haurra.

Izan liteke Berlin edo Detroiten

nekez gure auzoan

gure auzoan ez baitago haurrik.

Azaroan gaude

baina langabetuak ezjakintasunean bizi dira.

Kalean zoroek hegoaizea pairatzen dute.

Zuhaitzetako azkenengo hostoek

antolatu dute La r‚sistance

eta udazkenak terroristatzat hartu ditu.

Kioskoetan ez dute kanikarik saltzen,

sasoi makalak bigarren eskuko liburuentzat,

sitsek etxeko altzariak jan dituzte,

ez dituzte ba sitsek makarroiak jango.

Kalean zoroek hegoaizea pairatzen dute.

Milaka eta milaka litro ur

bota dituzte kaleak txukuntzeko

eta gabardina saltzaileek

dibidendoak banatu dituzte

kale garbitzaileen artean.

Elizetako bankuak hutsik daude,

antza denez errosarioak misterio guztiak galdu ditu,

Amerikako gangsterrek eta hiltzaileek ere ezin dute

taberna eta jatetxeetan erre.

Kalean zoroek hegoaizea pairatzen dute.

Kalean zoroek hegoaizea pairatzen dute,

izan liteke Kuala Lumpur edo Adis-Abeban,

nekez gure auzoan

gure auzoan eroetxeak baititugu barra-barra

eta ez dago hegoaizea pairatzeko zororik kalean.

© Jon Gerediaga