EGUERDIA UQBAR-EN, ARRASTIRIA DONEZTEBEN

        Luis Garde , 2008

Ezkutuko txosten batean

idatzi arma irrealak

betiereko gerra pizteko gai

baldin badira;

suntsipen orokorreko armak

hitz gezurtiak

beirazko misil haragiztatuta

merkatu pertsiarraren larunbateko eguerdian

          lehertzen badira,

arropa nabarrak,

hegaztiak,

frutak,

txanpon handiak

gorriz tindatuz;

ez dute balioko

poematxo honetan sartzen ditudan

arrosa urdin hitzen hostoek

arrats honen gorrimina ederragotzeko?

© Luis Garde