ERREKATXINDORRARENA

        Jabi Santa Cruz , 2008

Zumearen azpian uzkurtu ginen,

grabagailua eskuan genuela.

Errekatxindorraren kantua jaso nahi nuen

kosta ahala kosta.

Luzetsita nengoen, aspertuta,

eta zure piercing-arekin hasi nintzen jolasten.

"Aizu! Geldituko zara behingoz"

bota zenidan.

Atoan, txoriak,

berebiziko indarrez erantzun zuen,

hamar silabako purrustada luzea osatuz.

Trenean,

hirira bueltan gentozela,

behin eta berriz entzun genituen

elkarren josita gelditu ziren esaldiak,

itzulpen mimetikoa ziruditenak.

Guk ez beste inork

uler lezakeen kontua horrela sortu zen.

Orduz geroztik, pipertzen zarenero

"ez niri errekatxindorrarena bota gero"

entzun behar,

zumearen azpian uzkurtu baino lehen.

© Jabi Santa Cruz