EZIN ZAITZAKET ALDATU UDABERRI HORI HONETAN

        Ana Urkiza , 2002

Negu gorriko

kale hutsetan barrena

besoa eskaintzen didazu

batzuetan.

Ilunabarrean

begi gris argietara soa lipar

ohe otzanari laztan zekena lapur

eta maite nauzula nik

ulertu nahi.

Noizbehinka

kunplitzen ote duzun

galdetzen didazu

zorrak kitatu nahian

eta itaunka erratu

umetako tiple-ahotsez:

—Zer gehiago nahi zenezake?

Horregatik denagatik

ezin zaitzaket aldatu

horregatik denagatik nago

hain urduri

        urrun

         egarri

         minbera

udaberri hori honetan.

© Ana Urkiza