ITZAL DEZAGUN ARGIA

        Karlos Linazasoro , 2010

Itzal dezagun argia.

Badakigu maitatu izan dugun guztia

ez dela alferrik.

Hormetan dago idatzia gure izenen

zerrenda: begi, aberri, uda, txolarre.

Denak du usain bat,

denak egiten gaitu hilkor edo betiereko.

Ez kezkatu, maite.

Itzal dezagun argia.

Gauez gorputzek soilik egiten dute talka,

eta iluna ez da desohore,

ez da isiltasun amestu.

Lokar gaitezen buruz buru,

eta pausatuko zaigu ezpainetan urretxori bat.

© Karlos Linazasoro