ESNAERA

        Ana Urkiza , 2002

Gaur, emakume izanik esnatu naiz.

Etsaien lerrora deitu naute

hirugarren mundu gerla hasi da

«iraulketa!» oihu egin dut

haurdun nagoela.

Dei zuzena izan da

inor asaldatu ez duena

bakarrik burutu beharreko guda hau ere

bigarrena bezala.

Belaunaldi gazteek nozituko dituzte

lubakietan odolustutakoen aieneak.

Bazterrak harrotuko dituzten

ahots erkinduak dira

fusil automatiko berriak.

Eskerrak eman dizkit iratzargailuak

zaratarik atera ez izanagatik.

Katetik tenk egin gura izan arren

eztanda aurretik utzi dut leherkaria

jakin

erruz baitakit

erlojua geldituta ere

urak berez apurtuko direla.

Gaur, aitor dut emakumea naizela.

© Ana Urkiza