DONALD JUSTICE-REN ARAUERA

        Andolin Eguzkitza , 1993

Maite zaitudalakotz naukazu

beti

zure esperoan,

maite zaitudalakotz

beti

zurekin egotekotan.

Autobusetan sartu orduko

eta gidariari txartela ordaindu,

goizean goiz garbitu bitartean

eta neure aurpegia ispiluan ikusi,

hor zauzkat

beti

bizitze honen hodeiertz amotza

zorrozten lagunduko didazulakoan,

lertxoinen ene saldoari

Afrikarantz zuzenduko duzulakoan,

eta hegoaren beroaz xamurtuko zaizulakoan

eneganako bihotza

hor naukazu

beti

zure gorputz eztiaz

gozatzeko esperantzan.

Lo egitean eta ibiltzean,

jaiki eta etzatean

zaitudalakotz maite

ezin zaitut begien bistatik kendu,

ezin zaitut bihotzean hil,

ezin zaitut neure oroimenaren landaminetatik iraitzi,

ezin naiteke zurekin ahantz.

Hainbeste lore ihar,

hainbeste lizundi hats txarreko,

hainbeste arbuio zoli,

hainbeste destain mazal,

eta halaz ere

hainbeste maitasun.

Maite zaitudalakotz

prest naukazu

beti

zuganantz joateko,

maite zaitudalakotz

beti

zure gorputzarengana ekantzeko.

© Andolin Eguzkitza