SEMEAREN ESKUA

        Mari Luz Esteban , 2013

Ama hil berritan,

ohearen ertzean

ezerezari oratua

topatu nau hiru urteko semeak.

Zer duzu ama?

Zergatik zaude hemen ilunpetan?

Amama hil da -xuxurlatu diot-,

eta non dago orain? --galdetu du--,

inon ere ez -erantzun diot-

baina non? -errepikatu du-

gure gogoan -erantzun diot oraingoan-,

gure bihotzean,

hortxe biziko da hemendik aurrera

beste inon ez dago.

Hurbildu da,

eskuineko eskutxua pausatu du

nire ezkerreko masailean,

bi segundu, irrifarño bat,

gelatik irten da.

Aita -entzun diot-, jolastuko al gara?

© Mari Luz Esteban