AHAZTU ZITZAIZKIDAN GUZTIAK

        Maialen Berasategi Catalan , 2021

Ezer kontatzen ez zuten ipuinak

idazteko beldurrez ahaztu zitzaizkidan

ez oso miopeari antiojuak etxean nola

enaren zirimola zentzugabea

zapata-konpontzailearen tok-toka

teilazahartutako teilatuak oro har

behe-laino goizalban kobretua

ziertzoaren besarkada basa

farola-sistemako eltxo-satelitea

eta are mahai azpiko suontzia ere.

Asko-asko kontatzen zuten ipuinak

idazteko asmotan ahaztu zitzaidan

oso naizela miopea eta

oso direla hiztunak eta

oso behar ditudala

ahaztu zitzaizkidan guztiak.

© Maialen Berasategi Catalan