KUARTEL EDERRA

        Gerardo Markuleta , 2015

Kuartel ederra zen gure herrian.

Berpizkundeko unibertsitate

ondoan kokaturik, harri bistan

eraikia. Harriak agerian,

ezkutuan ziegak.

                        Kuartel hura

kanposantuko bidetik gertu zen,

errepide berriko zubiaren

ondoan. Garita kristalezkotik

aingeru guardako santutxuaren

kandela gorria ikusten zen.

Greba egunean, guardia zibilek

Ruben eraman zuten. Lehergailu

bat jartzen ari zela, zirtzilduta

hil zen Mikel. Santutegira bidean

lau guardia hil zituen bonba batek.

Hilerritik gora, San Juan auzoa,

han zure baserria. Zubiraino

laguntzen nizun nik. Besarkatzean

adarra jotzen zenidan, koldarra

deitzen, diru-zorroa fraketako

aurreko sakelan neramalako.

Zeru goia ukitzen nuen —ia—

zubi gaineko besarkada haietan.

Infernua gertu zen, agerian

eta ezkutuan, kandela gorri

goriak esku zabalez partitzen

kaleetan, kuarteleko ziegetan

eta santutegirako bidean.

© Gerardo Markuleta