ESAN EZETZ

        Gerardo Markuleta , 2015

 

 

 

(Madril, M-11)

 

 

         —1—

 

Esadan ez direla

gutarrak izan;

nortasun hutsen bat

egon dela, noski.

 

Kontaidan beste behin

esku beltzarena,

asma ezan konplot

nazioartekoren bat.

 

Esadan: ez duk egon

aurreabisurik,

inoiz ez duk izan

gure estiloa.

 

Esadan: ez dik inork

errebindikatu;

bagoien arteko

haragi erreak

ezin dik, ezin dik

gure labela izan.

 

 

         —2—

 

Esadak: berdin dun

noren eskua zen,

zeren izenean,

zein aberriren alde.

 

Esadak: eztandak

ez din deus galdetzen:

ez izen, ez herri,

ez fede-agiri.

 

Ez diat esku beltz

ez konplot zikinik,

hire larridura

doi bat baretzeko.

 

Esadak: ez zaidan

oinaze arrotza

arrotz jende horren

giza oinazea.

 

Bagoien arteko

haragi erreak

usain bakarra din:

gizaki urrina.

 

© Gerardo Markuleta