ARNASA HARTU

        Castillo Suarez , 2006

Nahiago dut zalantzekin ez bizitzea

zu biriketan igerian edukitzea baino.

Zure izena ozenki esan,

eta opariak korreoz gehiago ez bidali.

Baina begiratzen dizut:

ez duzu ezer esaten.

Orduan, iruditzen zait ihesi zoazela,

heldu beharko nizukeela besoetatik

larrialdi-simulakro honetan.

Bular iletsu baten gainean geratzen naiz lotan, ordea.

Nire adina bikoiztu egiten da horrela.

Esan,

nire beldur zara?

© Castillo Suarez