KE-BELARRA

        Emeterio Arrese , 1928

 

 

      Arazo-garaiz

      errezale naiz,

pipa da nere laguna,

      ke-belar oso

      samin ta gozo

nahastuen ontzi kutuna

 

      Pipa laburra,

      nere sudurra

usain-eginkor luzea,

      honen azpian

      dagon aldian

nik pozor bete-betea

 

      Nahien dan eraz

      maita det beraz

hatson darion belarra,

      honen bidez hain

      barru det orain

idarokizko txingarra

 

      Toxatik hartu,

      gainezka sartu

kider-buru sakonean,

      ke-belar hori

      urrinez jori

laster da sudur mintzean...

 

      Pipa txuria,

      kirten hautsia,

zorungai eder osoa,

      haur zahar batentzat,

      zinez neretzat,

edoski maite gozoa

 

      Ezpain ertzean

      pipa jartzean...

agur! kezkaren goibela:

      buruhauste zakar

      guzik bai azkar

banatu kea bezela!

 

      Uste bat oker

      irtenda loger

etsaiaz etsai banago,

      pipari esker

      ez du gau-lisker

honek irauten luzaro

 

      Olerkarien

      ametsaldien

goraltzigarri da nonbait,

      hargatik nere

      olerki-xeme

apal hau berdin sortu zait

 

      Arazo garaiz

      errezale naiz,

pipa da nere laguna:

      ke-belar oso

      samin ta gozo

nahastuen ontzi kutuna

 

© Emeterio Arrese