GIZON JARRIAK

        Itxaro Borda , 1979

Jarriak otoi, gizon jarriak

        ez dira behar makurtu

haien bakea, bake segurra

        neholaz ezin da urtu

gizon jarrien bake ederrak

        ez dira behar apurtu.

Aseak dira, beroak dira

        beren sinestetan motzak,

harma zorrotzak hartzen dituzte

        eta zilatzen bihotzak:

gizon jarriak, gure anaiak

        ordean arras arrotzak!

Kurutza edo igitai hura

        eskuan dira sorturik,

ahoak ezti, gezurrak egi

        ukamilak gogorturik

saindu-sainduak gizon jarriak

        badabiltza legorturik...

Sinesmenetan bizi-hazturik

        dira jarriak lokartu,

gure herriko gider makurrak

        dituzte finean hartu.

Jarriak otoi, gizon jarriak

        ez ditzagun iratzartu!

© Itxaro Borda