BAZEN BEHIN

        Joakin Balentzia , 1994

Ahanzturaren kontra egunero borrokatu behar dugula

noizbait erran didate lagunek

eta nik halaber uste dut

ahanzturaren alde egunero ere

zerbait egin behar dugula nahitaez,

ez baitut nahi beti gogoratu

besteen partetik pairatu dudan ahantzia,

edo txatxu harro horren mespretxu iraunkorra,

edo susmatzen ditudan injustiziez

beti oroitzen bizi ez dut nahi,

edo tamalez hondamenera gabiltzala,

gizakume murritza naizela badakit

eta ezin naiz etengabe

izan ohi ditudan ezbeharrak

behin eta berriz gogoratzen bizi

eta nahigabeen ahanzturaren alde

zer edo zer egin behar dut

neure burua eta denbora

nolabait engainatzen,

neure sentimenduak eraldatzen,

mozorrotzen, itxura egiten,

eta horrela ere behin betiko

ahanzturaren kontra egin,

neure bizitzaren kondakizun propioa

egunero moldatu, apaindu, asmatuz,

alegia, bazen behin...

© Joakin Balentzia