IZANGO DA

        Tere Irastortza , 1982

Izango da

zubiren batean,

haizearen gordelekuko

bidean,

itsaso berriren batean,

tanta urdin eta pinporta arrosaz

bildurik.

Aurkituko dugu

putzu zaharren batean,

ihintzaren txokolate usainez

gozaturik.

Aurkituko dugu

izaretako izar-urratsetan,

urratuetan

gauak lorrean uzten duen

tristuraz,

malkoz bustirik

dizdira betean,

tximista irmoturen batean.

Izango da

instante berririk

biharren bat.

© Tere Irastortza