ESTAZIOKO TRENAK

        Txili Lauzirika , 2003

Lehengoan zutaz galdetu zigun Baudelairek,

betilun aldegin zuen lehenbailehen

estaziotik ateratzen zen

lehendabiziko trena

hartu behar zuela esanez,

bat-batean aldegin zuen...

Eskuarekin diosala egiteko ere

ez zuen izan denborarik.

Kapelua eta txamarra

aulkian ahantzita utzi zituen

zigarreten kea bezala

eskuartean abaildu zen

haren presentzia.

Egia esan... ez zitzaion arrazoirik falta

estazioko trenak ez dira gelditzen

inoren zain garai hauetan.

Camile, arrazoi zuen Baudelairek

egunak grisak esnatzen zirela esatean

arrazoi zuen nolabait

betiko erantzun berdinen zain

zutaz galdetzen duenean

bidaltzen dizkizun fax-ak

leitzen ez dituzunean

arrazoi du Baudelairek

gutunen erromantikotasuna

hil dela aldarrikatzean.

Arrazoi zuen gaixoak...

nahizta estazioan

ez den gelditzen (sekula)

trenik bere zain

arrazoi zuen Baudelairek

gauaren erdian

loreak hilik

esnatzen direla

esatean.

© Txili Lauzirika