NIK EZ DUT EZER EGIN

        Gaizka Amondarain , 2002

Elurrak gaua desterratu zuen

           eta hiria argiz jantzi negu erdian

Haizeak ume bat bahitu zuen kometa eta guzti

Eta jendeak ahozabalik begiratzen zion

              negarrez zerurantz zihoan umeari

Papelontzietan erretako argazkiak baino ez

Tabernetan kantu zaharrak entzuten ziren etengabe

Boteila hutsak pilatzen ziren portaleetan

Eta bakardadeak bizitako agureak

              ardotan afalduko zuen bere zorigaitza gaur ere

Lanpara bat piztuta bosgarren solairuan

Hormigoizko lautada biluzia bihurtuko zen hiria

Trenbideak, agur baten pentagrama difuminatuak

Telefono deiek ez zuten amodiorik egiteko balio

Katuak protesta moduan larrua jotzen hasi ziren

              goizaldero amorratuta

Eta eskaileretan agertu zen postaria hilda

Norbaitek gure gutunak lapurtu zizkion

Eta errekak ur gabe geratu ziren egunetik gauera

Gu zubian pausatzen gara errekari begira pentsakor

«Egin dugun bakarra harri bat botatzea izan da!»

© Gaizka Amondarain