EGUNA EGONGELA EROSOA DENEAN

        Gerardo Markuleta , 1990

Eguna egongela erosoa denean

edo semaforoek agur berdeaz

baieztatzen duten ibilbidea,

eta orduak ispiluekin jolasean

ari direnean, ogiak egutegiei

begiratzen ez dielako

ez da, seguru asko, zilegi

barreak eta paisaiak ukatzen,

itsastxorien galdeak landatzen,

hitzak hotzaren hariez ehuntzen,

ispiluak nabigatzen ibiltzea.

Baina idazteak sarritan gogorarazten dit

edozein puntu gurutze ere badela

(berau ere bi marra besterik ez delarik)

eta edozein gurutzek espazioa zatitzen du.

Eta azken finean, injustizia hau ez da Herioa.

© Gerardo Markuleta