EREMUETAN

        Luis Mari Mujika , 1997

Eremuetan lehiaz bidari

—lerroak joan, lerroak etorri—

ikusmen nireak zoramen gori,

naturak emana zaida ongarri.

Begiratua dastatzen hats handiz,

begion xarma ederrezko zori

(Arabako lurrak hits eta hori)

nik jasoa baita hain asko, ta aunitz.

Zumar ta pinuen luzapen gaitza

ibarraren azken mugetan hiltzen,

gauza zaharrek joanaren antza.

Behean dudana bedi gora irten,

materia joan behingoz gorantza

umila dena gerta dadin gailen.

© Luis Mari Mujika