ATXABALTAKO EMAKUMEAK

        Kepa Akixo , 1992

Nere herriko emakumeek

argia dute begietan,

eta esku goxoak,

ezpainak umel,

amets epelak.

Aurpegi luzearekin

gona azpian iztarrak.

Nere herriko emakumeek

ezkongaien gerria dute,

emazteen bularrak,

sabela kumeak zain,

eztarrian penak.

Nere herriko emakumeek

dardarak dituzte gauean,

eta lo hartu ezinak,

ile orraztuak.

Iturri Gorrian aldatzen dituzte

oinetakoak.

Nere herriko emakumeek

intzaurrak biltzen dituzte neguan

eraztun ametsak,

orkatila zabalak,

horrela dira nere oroipenetan.

© Kepa Akixo