MAITE EZ DUENA

        J. A. Artze , 1998

    Maite ez duena

              ez da bizi,

                      bizitzeko beldurrez...

                      Bizirik ez dago

    maite ez duenarengan,

    maitatzeaz baita izu...

              Beldurra eta izua da nagusi,

                          eta herioa,

    maite ez duenarengan.

Bizitzera,

      maitatzera ausartzen ez dena

      beharturik dago gorrotatzera;

gorrotatuz, ez dagoela hilik nondik edo handik

            bere buruari erakutsi beharrez...

baina gorrotoa ez izaki

            heriotza bizitzea besterik!

            Izan ere, lagunok,

        zerbaitetarako behar bada,

    maitatzeko behar da hemen ausardia,

                                        eta haundia!;

    gorrotatzeko, aski da koldarkeria.

© J. A. Artze