HIL ZARA, AMA

        Karlos Linazasoro , 2012

Hil zara, ama,

gauaren muga-multan.

                                 Zure kopeta loredi bat zen

musu eman dizudanean.

Hitzak eta malkoak etorri dira

                                                  jarraian,

                                                  eta zuritasunaren labana.

Zeri begira zaude, ama, begi-zimurretatik?

Aitak erakusten dizun bideari, akaso?

                                                                        Zoaz orduan,

                                                                                                 zoaz,

hegan gugandik gora,

              gure barrutik guganago,

aita gure zainetan baitago,

atsedendua eta biluzik,

                              zure izena ereiten,

ubide guztietan

                                       oihuka,

ia-ia isilik,

paradisua izan dadin biontzat

                             errezo eta aberri,

putzu    orbel    eguzki-lore    katagorri,

                             bizi berri bat

                                                       beti-betiko.

© Karlos Linazasoro