IBARREKO OLA

        Emeterio Arrese , 1930

Beotibarko zelai aldera Tolosatik hurbilean

emai gozoa nabari zaion ibar loretsu batean

Etxaniztarren olaundi hori ugertzik babesenean

betigaraiko tankeraz dager hain sendo bere zaharrean.

Olaren barru

tinki ta tunku

egikor mailu ta gabi

eginahal bero

goreskarri hau

eukal endaren ikurdi.

Lehen ia berrehun bai omen ziran orain hau bakar-bakarrik

bakar hau baina betiro gailen, betiro zaharberriturik...!

Inoiz ez zaio sortuko beraz herdoil, huntz eta sasirik

bakar honeri egundaino ez itzaliko sutegirik.

Ur-jauzi, ardatz

hauspoen arnas

ingude, sutoi txingarti

guztiak hemen

aldi berean

lankide oso ta bizi.

Sei-zazpiren bat langile bertan lehengoen jarraikitzaile

begiak zoli, besoak einkor, tankarik huts egin gabe

ipuin zaharreko zenbait irudi bezin kementsu, goterne

olagizonak biziro jator, uzkur-nagi ez behinere.

Indar sendoaz

tunkutu joaz

darraion garaiz lanari

olaren hotsak

erraldoi baten

tanpaka zinez irudi.

Etxaniztarren goresle dira hots alai entzungarriak

gabi zaharraren tunkutu eta mailuketaren tintinak.

Gora ba zuek... olajaun eta zuen ekide guztiak

zuen omenaz betirain beze lan eresi hain garbiak!

© Emeterio Arrese