—20—

        Alaine Agirre , 2017

Bigarren gauean

koadernoa boligrafoa musika entzuteko gailua

kendu zizkidan sorgin batek

eta armairuan gorde zituen

giltzapean.

Ordutan egon nintzen

sabaiari begira

negarrez

ez nekielako non eta zerekin idatzi

ez nuelako norekin hitz egin.

Neu bakarrik nengoen

neure neura ikara izu obsesio minari

begira.

Ezinegona.

Ezin-neu-egona.

Gaur azkarragoa izan naiz

sorgina baino.

Koadernoa boligrafoa mp4a

koltxoiaren azpian gorde ditut

logura aurpegia jarri diot sorginari

txintxo irentsi ditut ahora eman dizkidan pilulak

eta joan denean

manta bat hartu

lurrean zabaldu

eta gelako irteera seinalatzen duen

argitxoaren pean

idazten jarri naiz.

Horra hemen irabazi dudan

batailatxo bakarra.

© Alaine Agirre