—27—

        Alaine Agirre , 2017

Berarekin paseatzen dut hemen

psikiatrikoan gora eta behera.

Bere liburu bat daramat poltsikoan

triparen ondoan

bihotzaren alboan

batzuetan, eseri eta altzoan hartzen dudanean

are nire sexuari pegatuta ere.

Liburua ireki eta poema bat irakurtzen dut

ausaz.

Gehienetan iruditzen zait ez dudala ulertzen

ez naizela iristen bere berben muinera.

Batzuetan ordea.

Ez, ez: beti

sentitzen dut igartzen dut ondoegi

ulertzen dudala

bera

ni neu izan nintekeela

emakume masturbatzaile hori

ama damutu hori

jainkoaren galdez dabilen gaixo galdu hori

psikiatrari poemak eskaintzen dizkion idazle hori.

Banaizela bera.

Banaizela

zu.

Zuk mokasinak egiten zenituen beste erien artean

nik zumitzezko otzarak.

Zuk bi aldiz erabaki zenuen zeure buruaz beste egitea

nik behin edo; ez nago ziur.

Zure poemak besapean hartuta paseatzen dut

hemen, Anne

zurekin, Sexton.

© Alaine Agirre