IDAZLE GAZTEA (OLIOA MIHISEAN)

        Josu Goikoetxea , 2018

Ziega itxurako

Donostiako gela honetan,

Amara Berriko pisu

herdoildu eta ordaindu honetan,

hezurrak hautsita dauzkat.

Aurrean dudan armairu handiak

(hiru ate, hiru ispilu)

gupida gabe laburbiltzen nau:

ohean, idazten, ilea koipetsu.

Lurrean arropa lohiak,

zapatilak, zapatak.

Mesanotxean zine aldizkaria,

komuneko papera,

iratzargailua

(02:39)

eta argazki gozo bat hautsa pilatzen.

Patiora doan leihoa eskuinean.

Badakit gauren batean

hementxe itoko naizena.

Buruko mina dut,

urduri nago,

tigrea naiz kaiolan.

© Josu Goikoetxea