TRAIDOREA

        Jean Barbier , 1910

 

 

Itsasoaren erdi-erdian

uhain kexuen artean

leihor bat bada dena harria

osoki izigarria.

 

Lur izigarri hortan loreak

beti daude sortzekoak

horko harria oraino ez du

belar berdeak apaindu.

 

Argizaria eta izarrak

gauaz han dire gordeak

lano busti bat beti zerutzat

ilun beltzena argitzat.

 

Arraintzalea urrunetikan

iragaiten delarikan

beti emaiten da ikaretan

zeinatzen dela kopetan.

 

Itsasoa da ari jauzteka

inguruka, intzireka

zerura buruz altxatzen dela

mendi zuri bat bezala.

 

Leihor hartara ur-hegaztina

sekulan ez da izana

harroka beltza, bere hegalez

noiz joko duen beldurrez.

 

Ur-hegaztina, otoi errazu

hola ihesi zer duzu?

Ez dut ikusten arranorikan

hegaldaka ondotikan.

 

Miru, arrano gaixtoak baino

lazgarriago oraino

ikusten dut hor izitzailea

Frantziaren saltzailea!

 

Zeru guzia goibel denean

leihorraren bazterrean

gizon bat han da, beti xutikan

nigarrez diolarikan:

 

"Saldu izan dut nere Frantzia

zatozkit heriotzea!

Zeru-lurrez niz mehatxatua

orok madarikatua!"

 

Boz bat entzun dut izigarria

haize batek ekarria:

"Ez duk izanen heriotzea:

saldu izan duk Frantzia!"

 

© Jean Barbier