BIZITZAK GORANTZ

        Karlos Linazasoro , 2012

Bizitzak gorantz luzatzen ditu besoak.

Baina bizitza, geroan, ez da deus.

Ikatza eta mahastiak gaur dira.

Gaur gara gu musuka, edo atzoko etzi.

Oroigarriek egiten gaituzte hilkor

eta, beraz, zorioneko.

Maitasuna gaurko gudua da,

gaur emango zaigun garaipena edo zigorra.

Ez dago besterik.

Bizitza bizitzaren hondarra da,

kantuak uzten duen airezko usain arina.

Ez begiratu aurrera, kuttun:

inor ez da bizi hor kanpoan,

gertatu zen guztia berriro gertatuko da.

Gaur da argia ederren.

Orain dituzu ezpainak haragizko.

Hegaldiak ez du etorkizunik ametitzen.

Gugan bukatzen dira mugarri guztiak:

denbora, espazioa, eternitatearen hobena.

© Karlos Linazasoro