NON ZAUDE

        Jule Goikoetxea , 2014

 

 

Non dago

dantza iniziatiko hura

koktel eta pelotazo artean

zure Morgan esmokinarekin

zure zigarro zuriarekin

zure zuhur bibotearekin.

 

Non dago

militantziaz

labezomorroz

eta hezetasunez

betetako etxe hura zaintzen zuen

sentikortasun

insolbente hura

 

gau eta egun

nik 15

zu pobre

Donostia aberats.

Lola estás Loca, Plarena.

 

Non daude

uhinek eta zure

insultatzeko moduak

ofenditutako

paseo

beti berri

betirako eten haren

intimitate borraskadunak,

zure aterki beltza

zure egunkari euritsua

eta nire eskua

zure eskuaren aurka

urduri borrokan.

 

Non zaude Tomas.

 

Non dago

gau eta egun

galmenaz

isilik

mendekatzen zen

zure begiradan gordetako

malenkonia

 

ni bideratua

zu pobre

Donostia aberats.

 

Non dago

algara tinko hori

militantziaz

labezomorroz

eta hezetasunez

betetako herri hau ernaltzen.

 

Non daude

pentsatzen ikasi nuen

tugurio haiek

 

non erresistentzia

bizitzeko modu apasionatua den,

eta maitatzen jakitea

ez den maitatzea.

 

Non zaude Tomas.

 

© Jule Goikoetxea