PIP' ETA TU

        Piarres Ithurralde , 1923

Ikusi duzu nere liburu andana

mahain baten gainean lerroan emana....

Bainan hemen sakelan dut baliosena

zahar izan behar da "Job" baitu izena.

Berak bere adina liburuak dio:

izkiribu guzia denborak joan dio.

Orai irakurtzeko deus ez du balio.

Ez dut halarik ere batere hastio.

Huna nola maizenik duten erabiltzen

hosto xuri ezti bat diot ateratzen.

Bertze hostoak aldiz bekaizti ez diten

Heien aldia ere laster zaie jiten.

Dena den, hosto hura ontsa zabaldurik

bainan eri puntetan aski bihurturik

ezartzen diot, kasik arroila beterik

hoin maite dutan belar idorño hartarik.

Nere belarño hura ez dakit zertako

frantsesek deitzen duten: la douce herb … Nicot.

Dakitan guzia da on dela barneko

jakitate aski da hola neretako.

Belarra dutalarik xuriz inguratu

eta nere milikaz estalgia lotu

punta diotalarik pindar batez piztu

egiten dut jarririk ontsa... pip eta tu!

© Piarres Ithurralde