SINEKDOKEA

        Angel Erro , 2022

(grek. synekdokhe, ondokoaz ordezkatzea)

Tropoa da, metafora eta metonimia bezala,

aldamenekotasun erlazioan oinarritua.

Literatura Terminoen Hiztegia

Autobusean nekeza da bidaia. Nahiz eta

oso ederrak diren hor kanpoan alorrak.

Eskuan zeneraman ingelesezko liburua

edo zure jantziak —markako sinekdokeak—

hemen aipatuta ere ez nuke deus argitzerik.

Agian, agian niri, eta niri bakarrik, gogora

ekarriko lizkidake, autobusean sartu zarenean

eserlekurantz, zu ikusi izanaren zirrara

gero eta urrunagoa eta hitzetan neuretzeko bulkada.

Orain, lerro hauek idazten ditudan momentuan,

kirolari sorbalda (ederra egin duzu!) ikusten

ahal dizut eta buru kizkur beltzarana ere bai,

aurreko eserlekuan pausatua, Bilbotiko autobusean,

tarteka eskaini eta ondoren ukatzen duzuna,

nonbaiteko mutil triste horrek, etxerako bidaia

oroitzapen eta ameskizun ederren segida

bihurturik, gauez bakarka aletzeko modukoa.

Lotan zaude, antza. Lo egin ezazu, arrotz.

Oraindik ordubete falta da Iruñera iristeko

eta nik zure hazpegiak azkenengoz

gogora ekartzen saiatzeko, zutitu eta ahanzturak

bakoitza bere aldetik irentsi baino lehen.

© Angel Erro