Egile berarenak:
NIK EZ DUT EZER EGIN
(2002)
HERIOTZA EZ DEN BESTE ZERBAIT
(2002)
GU IZAN GARA
(2002)
IZARA BERRIAK
Gaizka Amondarain , 2002
Lupa batez ari naiz
atzoko egunak utzi zituen aztarnei begira
Axola ez arren, jakin nahi nuke nondik egin zuen ihes
Zenbatgarren bagoia bahitu zuen
Ea bide urperatuak aukeratu zituen
ala damuaren laberintoan galdu zen
Patua dakusat kiribiltzen etxe aurreko patioan
Eta etsipenezko hektareak zabaldu ditu egun berriak kalean
Gure funtsa harresitu zuen arkitektuak
izango du azalpenen bat
Pauso bakoitza galdu den segundu bat dela pentsatzeko
Ez dut behar izara berririk
Ditudanak ditut gogoko
Nire usaina darie
Hirurogei kiloko etsipenezko hektareen usaina
Egunero fumigatzen dituzun hektarea horiek dira nireak
Nekatu dira dena urrunetik ikusteaz
Eta desio guztiak jaretsi nahi lituzkete
Begi horiek zeruarenak ala itsasoarenak diren jakin orduko
Bagoi guztiak zeharkatu nahi lituzkete oihukatuz;
«Nork galdu zuen aukera bat atzo?»
Baina badakit zu aurreko estazioan gelditu zarela
Eta bagoietako jendea eroa banintz bezala
geratuko zaidala begira
Itogarria da sentsazio hau
Ezagutzen ez dudan zerbaiten ausentzia
Eta logelako leihoan etxeko alfonbrak astintzen ditudan bitartean
Gogoratuko naiz gure funtsa harresitu zuen arkitektoaz
Atzoko egun madarikatuaz
Eta pauso bakoitzean galtzen ditudan segunduez
Zure begiek eta nireek sasoi batez elkar ezagutu zutelako
eta orain ahazturaren testigu isilak baino ez dira
© Gaizka Amondarain
| anonimoak |
| mendeak |
| 15 |
| 16 |
| 17 |
| 18 |
| 19 |
| 20 |
| 21 |
| poemen aurkibide alfabetikoa |