EZ NAZAZU BEGIRATU

        Karmele Jaio , 2015

Ez nazazu begiratu,

ez dut lurralde ilunetara

bidaiatu nahi,

ez dut gauzak

haztatzen ibili nahi

argirik gabeko gela batean.

Ez nazazu zeurekin eraman,

nahiago dut hemen geratu,

kafe makina,

etxeko giltzak

eta lanpas zaharraren alboan.

Ez nazazu ezagutzen ditudan

gauzetatik aldendu,

ikasi dut haien ertzak saihesten,

ezagun ditut haien usainak,

haien egur zaharrak,

haien metal berriak.

Ez nazazu urrundu aharrausietatik,

igogailuko hizketaldi hutsaletatik,

familiako bazkarietatik,

programatutako sexutik,

betiko autobusa hartu aurretiko

pazientzia ezetik.

Ez nazazu begiratu,

zure begien tontorrean

arriskuren bat dagoelako,

ziur,

izotza, elur-jausi bat,

uholde bat,

berarekin eramango dituena

aulkiak, landareak, erosketa zerrendak, sardexkak, liburuak,

babesten nauten

benetako gauza guztiak.

© Karmele Jaio