Egile berarenak:
HILBERRIKO IZPIRITUA
(1999)
ITZALAREN SAKONEAN
(2001)
PROUSTITUTA
(2003)
DEUSEZA, ELIKAGAI
(2010)
OTEIZAREN EBANJELIOTIK
(2010)
HUTSUNEAREN HATSA
(2010)
CREDO IN LUCEM AETERNAM
(2010)
IBAIAN BEHERA
Pello Otxoteko , 2003
Bizikletan joaten den postaria
nahi nuke izan
eta izarren hautsa
munduko barrunbe guztietan eman.
Baina sarri askotan
ateak itxiak daude
eta alogerekoa lotan.
Erruz itxaron behar atearen aurrean.
Erruz itxaron behar bizitzaren horretan.
Errealitate hau itxaronaldia da,
eta itxaronaldi honetan
pausoka irekiz goaz gure begiak.
Itxaronaldia bizitza honetan
larritasun bilakatzen da,
larritasunezko ibai bizi eta aldakorrean.
Asegaitz, ibaian goaz,
igeriketa azkar eta gogorra
itxaronaldi luzea besterik ez delarik,
ur-jauzi bukaerakora
garamatzan itxaronaldia.
Eta ur-jauziaren hurbilean
hausturaren zirtek
aurpegian jasorik
ziurtatuko digute erorketaren bidea,
altueraren luzera norainokoa den
inoiz argitu gabe.
Bizikletan joaten den postaria
gaur zaigu galdu
eta izarren hautsa jada
ezin da zabaldu.
Ez ditugu gehiago
ateak itxirik aurkituko
eta etxetiarrak itzarririk dira egongo.
Erruz damutu behar luzaroan itxaroten.
Erruz atsekabetu behar ezezagunaz galdetzen.
Esango al zenioke
ur-jauzitik libratu
eta lizar-hosto berdean
zintzilikaturik geratu den ur-tantari,
azkenean, nola edo hala,
ur-jauzian doazen tanta guztien
helmuga berbera izango duela?
Nolatan atxiki Eguzki izpiak?
Nolatan eskegi lurrunaren hats berotan?
Amets egin dezagun hego zabalik
amets egin dezagun gogoz beterik,
haizea dastatu argi pirrintan
eta apaltasunaren soseguz
printza bihurtu
negu minean,
arratsa den
ibai erriberako alde honetan.
© Pello Otxoteko
| anonimoak |
| mendeak |
| 15 |
| 16 |
| 17 |
| 18 |
| 19 |
| 20 |
| 21 |
| poemen aurkibide alfabetikoa |