UDAZKENAREN KALKULURAKO METODOA

        Xabi Borda , 2009

atera anorakaren patrikatik klarion beltza

egin azpimarra luze bat behatzetan

zenbatu dezagun euria

hasteko belarriko saskian bildutako tantak

bosteko multzotan jarri

eta hezetasuna neurtuko dugu

gero lortutako zenbakiari belarra gehituko diogu

etengabe urruntzen diren urratsak

eta aireratu ezinez lurra jotako hitzak

azkenik emaitza bazterretan zabaldu

eta bidearen kilometro kopuruaz zatitu ondoren

lokatzaren bataz bestekora hurbilduko gara

eredu honekin udazkenaren nondik norakoa

hodei beltzen geometria

aterkien diametroak kalkulatuko ditugu

© Xabi Borda