Egile berarenak:
GORPUTZ HONETAN
(2009)
SORO BAT GIBELEAN
(2009)
BRIGADISTA
(2009)
JOSE PEREA PINTOREAREKIN BART GAUEAN
(2009)
IHES EGINGO DUZU
(2009)
LUR HAU
(2013)
FABRIKA ZAHAR BAT DA IRAGANA
(2013)
SAMURTASUN POLITIKO BAT
(2013)
ERRAZKERIAK
(2013)
PATIOKO EMAKUMEA
(2013)
BRUSELA EZ DA EXISTITZEN
Oier Guillan , 2013
BIGARREN ESKUKOAK
Bigarren eskuko objektuak balira bezala
saltzen dituzte oroitzapenak
Waterloo kalean: iragan zatiak,
zeinei memoria ukatzen zaien
egunerokotasuna fikzioa denean.
Klandestinitatera derrigortu dut neure burua,
bake aroan ere adi egotearren.
Errealitatea fikziotik at asmatu,
oholtzatik eta orri zuritik harago
bizi den irudimena edo iraultza.
Zigarro bat erre terraza hotz batean
erretzailea izan gabe,
unearen mapak ezbaian jartzearren.
Bulkada eramangarri honek
manikien ezinegonari kantatuko lioke,
plastikozko zurruntasunetik askatzeko
urtaro berri bati: bosgarren urtaroari,
plastikozko loreen sasoiari.
GHETTO
Txotxongiloen kanposantu bat behar du
hiriaren plano honek.
Europaren bihotza dioten lekuan
Matonge auzoa da taupada posible bakarra,
Afrikako zauria den kalea,
dantzarako prest dagoen asteguna.
Ileorde horiak harrotasunaren seinale,
la vie est belle oihukatzen duen emakumea
gerri mugimenduan izoztua.
Jela iluna da hemen, azalekoa,
arriskutsua bezain liraina.
Zuritasunak begiak itotzen ditu
arrazakeriaren kontrako larderia ahoskatuz
alkoholaren ertzetik,
ehun eta hogei kilo odol
listua kolonizatzeko prest.
Baztertuen leinukoa naiz gaur ere,
periferia samurren baitakoa,
ahozko literatura beltzaren ezpalekoa.
Etxean nago
une batez hemen.
HETERRORISTA
Terrazaren aurretik pasatzean
ezpainetan pausatu du kea, niri so.
Geyper Man honen zurruntasunak ez du jakin
soka tenteen laguntzarik gabe zakiltzen.
Komun estuen free land bat
atxikirik darama ahoan, isilik,
heterorrista naizenetz zalantzan.
Ez dut aberria aipatu behar izan
ez diren lekuetakoa nagoela aitortzeko.
© Oier Guillan
| anonimoak |
| mendeak |
| 15 |
| 16 |
| 17 |
| 18 |
| 19 |
| 20 |
| 21 |
| poemen aurkibide alfabetikoa |