ESKRIBITZEKO OFIZIOA

        Felipe Juaristi , 1986

Behatzak, mendi iheskorrak.

Eta horietatik zehar

nire arima isurtzen da

munduaren gozotasunaren atzetik.

Batzutan, lehortu den ubidea bezala.

Bestetan, zeharkaezinezko ibaia.

Txori arinak, ezagunaren armonia bilatzen dute,

oreka moduko hori urrun eta hurrearen artean,

idatz makinaren forma metaliko eta zaharretan zehar.

Itsas-arteak kontinenteak bezala,

den dena, sentsazioek jasotzen dutena

nire gorputzari lotzen diote.

Teklen espazio ilargiar eta burnizkoekin urtuta

behatzak ez ote dira errealitatea deitzen den patura

zuzentzen nauten ontzi nagiak?

Bizitzaren luzagarria bihurtzen nauten hariak?

© Felipe Juaristi