GELTOKI BAT SIBERIAN

        Luis Garde , 2009

Xüberoko tren-geltoki bat:

bakarrik egoteko,

isilik egoteko,

inor ez itxaroteko lekua.

Xüberoko tren-geltoki batean sartzen den hura

Siberiako nasa izoztuetan

ezdeusari kateatua azaltzen da.

Haurtzaroko geltoki kalamastrak

oraindik bisita daitezke

hala hemeretzigarren mendearen ipuin errusiarretan

nola Transiberiarraren geltoki xüberotarretan.

Inon ez bezala isiltasunaren ibilera usna daiteke hemen:

hodei baten zatitzea,

errail atzenduen dardara,

Pariserat morroi joan zirenen hutsa.

Zurekin maitemintzen den oro

zure biztanle bakarra da;

Pays de Soule, Haute Soule, bularrean Heart and Soul:

zure berorat etor ez daitezen

parke tematikoetan aberriak eraikitzen duten horiek.

Etxe utzien herri zuri-beltza eta bertikala,

beira berdezko basamortu sekretua.

Hotza zu; ez zu beroa.

Oi Siberia.

© Luis Garde